2020-жылдын 1-январынан 2024-жылдын 1-майына чейин КР Президентине караштуу Улуттук стратегиялык демилгелер институтунда (УСДИ) бюджеттин аткарылышынын шайкештигин жана ресурстарды башкаруунун эффективдүүлүгүн баалоо максатында аудит жүргүзүлдү. Бул аудит КР Президентинин 2024-жылдын 12-апрелиндеги жарлыгы менен реорганизациялоо жүргүзүлгөндөн кийинки өзгөртүүлөрдөн кийин жүргүзүлгөн. Реорганизациянын натыйжасында Улуттук стратегиялык изилдөөлөр институту (УСИИ) жана Экономикалык саясатты изилдөө институту (ЭСИИ) бириктирилип, Улуттук стратегиялык демилгелер институту түзүлгөн.
Аудит институттун ишмердүүлүгүндө бир катар олуттуу мыйзам бузуулардын жана кемчиликтердин бетин ачты. УСДИде жумушчу пландын аткарылышы боюнча, жалпы жана ар бир кызматкер боюнча отчеттор берилген эмес, бул изилдөөлөрдүн жүрүшүн көзөмөлдөөнү жана баалоону кыйындаткан. Ошондой эле, изилдөөлөргө методологиялык ыкманын жетишсиздиги, алардын натыйжалуулугун жана продуктивдүүлүгүн анализдөөнүн жоктугу, ошондой эле күтүлгөн жыйынтыктарды болжолдоонун болбогону аныкталган.
Мындан тышкары, ЭСИИде 2022- 2023-жылдары иш-чаралар планынын аткарылбаганы жана 2020-2021-жылдар үчүн отчеттордун жана кийинки жылдардагы иш-чаралардын аткарылбаган себептери боюнча түшүндүрмөлөрдүн жоктугу белгиленген.
Аныкталган башка мыйзам бузуулардын катарында 447,5 миң сом өлчөмүндө бюджетте каралбаган айлык акы фондунан премия жана материалдык жардамдын мыйзамсыз төлөнүшү белгиленген. Ошондой эле кызматкерлерге бир жыл ичинде эки жолу эмгек өргүүсүнүн берилиши, бул КРн Эмгек кодексине каршы келген учурлар болгон. Бул каржы бузуулардын натыйжасында айлык акы, эмгек өргүүлөрү жана материалдык жардам түрүндө негизсиз каражаттар төлөнгөн.
ЭСИИден бошотулган кызматкерлер менен эсептешүү учурунда да каржылык тартип бузуулар аныкталган: аларга ден соолукту чыңдоо үчүн 1 130,4 миң сом өлчөмүндө негизсиз жөлөкпулдар төлөнгөн. Аудиттин жүрүшүндө 63,2 миң сом өлчөмүндөгү иш сапар чыгымдардын негизсиз төлөнгөн учурлары да табылган, бул учурдагы нормативдерди жана өкмөттүн токтомдорун бузуу болуп эсептелет.
Жалпысынан, аудиттин жүрүшүндө айлык акы, премия жана командировкалык чыгымдар боюнча 1,5 миллион сомдон ашуун каржы бузуулар аныкталган.
