2024-жылдын 23-30-октябрында Эсептөө палатасы GSAI (Аудитти колдоо боюнча Глобалдык демилге) долбоорунун «Методология, сапат жана отчеттуулук» компонентинин алкагында Польшанын Жогорку аудит органынын эксперттик тобун кабыл алды. Бул иш сапар улуттук деңгээлде аудит жүргүзүү практикасын жакшыртууга жана стандартташтырууга багытталган маанилүү этап болуп калды.
Иш сапардын негизги максаты – натыйжалуулук, шайкештик жана финансылык аудиттери боюнча жаңы методологиялык колдонмолорду колдонуп өткөрүлүп жаткан пилоттук аудиттерге колдоо көрсөтүү болду. Бул колдонмолор GSAI долбоорунун алкагында аудитордук процесстердин тактыгын жана ачыктыгын жогорулатуу максатында иштелип чыккан. Бул сунуштарды колдонуу мамлекеттик финансылык агымдарды жана башкаруу чечимдерин тереңирээк баалоого шарт түзүп, келечекте мамлекеттик органдардын ишине коомдук ишенимди бекемдейт.
Иш сапардын жүрүшүндө польшалык эксперттер Эсептөө палатасынын кызматкерлери менен бир катар жолугушууларды жана иш сессияларын өткөрүштү. Жолугушууларда аудиттин ар кандай методологиялык аспектилери, анын ичинде жаңы стандарттарга негизделген аудиттерди пландаштыруу, ишке ашыруу жана мониторинг жүргүзүү маселелери каралды. Айрыкча, Эсептөө палатасынын кызматкерлерин окутууга жана натыйжалуулукка багытталган аудиттерди өткөрүүдө туруктуу көндүмдөрдү калыптандыруу үчүн практикалык тажрыйба алмашууга өзгөчө көңүл бурулду.
Андан сырткары, польшалык кесиптештер өз өлкөсүндө окшош колдонмолорду жана практикаларды киргизүү тажрыйбасы менен бөлүшүп, бул кыйынчылыктарды талкуулоого жана аларды чечүү жолдорун табууга мүмкүнчүлүк түздү. Мындай тажрыйба алмашуу жана билим берүү эл аралык кызматташтыкты чыңдоодо жана мамлекеттик аудит жаатында адистердин квалификациясын жогорулатууда маанилүү роль ойнойт.
Иш сапар ийгиликтүү жыйынтыкталды: мындан аркы кызматташуу пландары белгиленди жана катышуучулар жаңы методологиялык ыкмаларды колдонуу мамлекеттик көзөмөл системасын чыңдоого мүмкүндүк берет деген ишенимин билдиришти. Польшалык эксперттердин колдоосу келечекте натыйжалуу жана эффективдүү аудиттерди жүргүзүүгө негиз болуп, аудитордук ишмердүүлүктүн кесиптик стандарттарын жогорулатууга кызмат кылат.