Кыргыз Республикасынын Эсептөө палатасынын Ош шаары, Ош, Жалал-Абад жана Баткен областтары боюнча аймактык бөлүмүнүн 2025-жылга карата аудитордук иш планына ылайык, Ош шаарынын 2024-жылдын 1-январынан тартып 2024-жылдын 31-декабрына чейинки мезгил аралыгындагы бюджетинин түзүлүшү жана аткарылышына, муниципалдык ишканалардын ишмердүүлүгүнө шайкештик аудити жүргүзүлгөн.
Аудитке, Ош шаарынын мэриясы, Ош шаардык Кеңеши, Кыргыз Республикасынын Финансы министрлигинин Ош финансы башкармалыгы жана Ош шаардык мэриясына караштуу бюджеттик жана чарбалык мекеме, ишканалары камтылды.
Шайкештик аудиттин жыйынтыгы боюнча жалпы 2 168 769,8 миң сомдук каржы бузуулар аныкталды (бюджет боюнча 370950,8 миң сом, бухгалтердик эсеп боюнча 1797819,0 миң сом), андан калыбына келтирилүүгө тийиш сумма 2020894,9 миң сом (бюджет боюнча 223181,9 миң сом, бухгалтердик эсеп боюнча 1797713,0 миң сом).
Аудит учурунда 1 739717,1 миң сом калыбына келтирилди (бюджет боюнча 586,1 миң сом, бухгалтердик эсеп боюнча 1 739131,0 миң сом). Калыбына келтирилбей калган каржы бузуулардын калдыгы 281177,8 миң сомду түзөт (бюджет боюнча 222595,8 миң сом, бухгалтердик эсеп боюнча 58582,0 миң сом).
Ош шаары боюнча жалпы 58394,9 миң сомдук каржы жана башка бузууларга укуктук баа берүү үчүн 23 материал укук коргоо органдарына жиберилди, анын ичинен:
1. Ош шаарынын мэриясы боюнча:
9798,0 миң сомдук каржы жана башка бузууларга укуктук баа берүү үчүн 7 материал Ош шаарынын прокуратурасына жиберилди.
2. Ош шаарынын Муниципалдык менчик башкармалыгы боюнча:
5110,3 миң сомдук каржы жана башка бузууларга укуктук баа берүү үчүн 5 материал Ош шаарынын ИИБ жана Ош шаарынын прокуратурасына жиберилди.
3. Ош шаарынын мэриясынын “Жибек-Жолу” муниципалдык аймактык башкармалыгы боюнча:
8584,1 миң сомдук каржы жана башка бузууларга укуктук баа берүү үчүн 4 материал Ош шаарынын Ички иштер башкармалыгына жиберилди.
4.Ош шаарынын жолдор муниципалдык ишканасы боюнча:
20109,9 миң сомдук каржы жана башка бузууларга укуктук баа берүү үчүн 3 материал КР УКМК Ош шаары жана Ош областы боюнча башкы башкармалыгына жиберилди.
5. «Оштогу көрктөндүрүү жана жашылдандыруу чарба комбинаты» муниципалдык ишканасы боюнча:
2166,2 миң сомдук нормадан ашыкча чыгымдарга жол берген муниципалдык ишканасынын жооптуу кызмат адамдарынын иш-аракеттерине укуктук баа берүү үчүн аудиттин материалдары КР УКМК Ош шаары жана Ош областы боюнча башкы башкармалыгына жиберилди.
6. “Ош шаарынын мэриясынын борбордук базар дирекциясы” муниципалдык ишканасы боюнча:
Келишимдин негизинде убактылуу пайдаланууга берилген “Дүң кант” базарынан 2023-жыл ичинде ижара акысы үчүн Ош шаарынын мэриясынын борбордук базар дирекциясынын директору Н.Исмаилов тарабынан ушул күнгө чейин ордуна коюлбаган 2822,1 миң сом акча каражатына укуктук баа берүү үчүн аудиттин материалдары КР УКМК Ош шаары жана Ош областы боюнча башкы башкармалыгына жиберилди.
7. “Ош унаабекети” муниципалдык ишканасы боюнча:
4348,3 миң сомдук негизги каражаттардын баланска кириштелбегендигине, өткөрүлгөн тооруктарды тескөөдө жана өз учурунда ижара мамилелерин жүргүзүүдө жалпы 5456,0 миң сомдук ижара төлөмдөрү жергиликтүү бюджетке төгүлбөй келгендиги боюнча, тийиштүү кызматкерлердин функционалдык милдеттеринин так аткарылышына жана ижара мамилелерине укуктук баа берүү үчүн 2 материал Ош шаарынын прокуратурасына жиберилди.
Аудиттин жыйынтыгы менен:
1. Тиешелүү чараларды көрүү үчүн Ош шаарынын мэрине, Кыргыз Республикасынын Финансы министрлигинин Ош финансы башкармалыгынын башчысына, аймактык башкармалыктарынын, муниципалдык ишканаларынын башчыларына сунуштама жана жазма буйрук жөнөтүлдү.
2. Отчеттун, сунуштаманын жана жазма буйруктун көчүрмөлөрү жергиликтүү Кеңештин сессиясында кароо үчүн Ош шаардык Кеңештин төрагасына жөнөтүлдү.
3. Ош шаарынын мэриясынын Муниципалдык менчик башкармалыгы тарабынан мамлекеттик имараттарды ижарага берүүдө, ижара келишимдеринин аткарылышына тийиштүү деңгээлде көзөмөл жүргүзбөгөн себептүү жалпы 836,3 миң сом бюджеттик жоготууга жол берген Муниципалдык менчик башкармалыгынын тийиштүү кызматкерлеринин жоопкерчилигин кароо боюнча Ош шаарынын мэрине сунуш жиберилди.
4. “Ош шаарынын С.Супаналиев 99/1 дарегиндеги А.С.Суюнбаев атындагы стадиондун трибунасын чатырын куруу” обьектиси боюнча “Универсал Компани ЛТД” ЖЧКсы тарабынан аткарылган иштерге түзүлгөн “Кабыл алуу актыларына” кошулган 3262,7 миң сомдук, ошондой эле “Ош шаарынын Р.Моминова көчөсүнүн №152 дарегине курулуп жаткан 120 орундуу балдар бакчасына откана, балдар ойноочу аянтча, ажаткана, саркынды суу, таза суу, электр тармактарын , айланасын тосуу, 250 кВА КГТП, өрткө каршы калкан жана жашылдандыруу” обьектиси боюнча “СК Оомат” ЖЧКсы тарабынан аткарылган иштерге түзүлгөн “Кабыл алуу актыларына” кошулган 1720,9 миң сомдук бирдиктүү салыктардын негиздүүлүгүн тактоо үчүн аудиттин материалдары КР Салык кызматынын Ош шаардык башкармалыгына жиберилди.
